التعبير عن المشاعر الايجابية و الحب

 ياا مساء الحب 

حبيت اكتب تدوينه بسيطه اذكركم بتفصيله تخلي حياتنا و صحتنا 

النفسيه افضل اللي هي ببساطه التعبير عن مشاعرنا 

الايجابيه للاشخاص اللي نحبهم 

اللي يخليني اكتب عن هالموضوع هو ، اني شخصيا جنت شخصيه خجوله و كلش استحي اعبر عن حبي او امتناني ، لان نشأت بعائله نادرا ما يعبرون عن مشاعرهم و حبهم اتوقع اغلب العوائل هيج لهذا لازم احنه نبادر بحضن ، كلمه لطيفه ، تقديم خدمه او اي لغه تناسبكم و تناسب الشخص اللي حابين تقدموله حب 

وزعوا حب وين متروحون حتلو انتوا فاقدين هالشي او ماكو احد مقدمه الكم ، اني دائما مع مقوله ( اعطِ انتْ ما تَحتاجه من مَشاعر ) 

راح ترجعلكم اضعاف هاي المشاعر و تخلي محيطكم مليان حب 

و كلمات ايجابيه ( كُن خيراً و سَيعود الخَير لك ) بكل شي بهالحياه

لازم نعبر عن مشاعرنا دام بعدنا عايشين حيجي وقت نندم على كل 

المواقف اللي ما عبرنا بيها ممكن من نفقد الشخص او التجربه 

كل يوم حاولوا تكونون سبب ب إبتسامه شخص بكلمات بسيطه

 يمكن ما تاخذ منكم دقيقه 

حتى الرسول الكريم أوصى  بهالشي ( نخبر من نحبه اننا نحبه ) 

خل يكون مبدئنا كلنا ( قل خيرا او اصمت ) قبل لا تطلع اي كلما من عدنا نفكر بيها هل نقبلها على نفسنا و شنو نحس اذا توجهت النا .! 

 بالنسبه للتعبير اكو هوايه كتب و افلام و ثائقيات تساعدكم بهالشي 

منهم كتاب - لغات الحب الخمس - من افضل الكتب برأيي من خلاله راح  تتعلمون شلون تفهمون لغه الحب الخاصه للشخص اللي حابين تقدموله هالحب و اهميته و يساعدكم بهوايه طرق للتعبير

الكتاب يحجي عن الشريك بس اكيد ينفع مع الكل 

*اضغطوا على اسم الكتاب راح تطلعلكم مراجعتي و تفاصيله

من فتره صارت ظروف بعدتني عن انسانه احبها هواي ، متعلقه بيها 

و تقريبا الوحيده اللي تفهمني اللي هي اختي و اعز  - من بعد ٣ اشهر التقينا - تقريبا حضنتها ربع ساعه ، شعور الحضن مينوصف 

فعليا يريح و يصلح هوايه امور 

-كذلك حضن الاهل و احتوائهم لاولادهم تأثيره ايجابي اكثر مما تتخيلون  ، اخويه الصغير كلما نشوفه نحضنه ، نسمعه كلمات حب هوايه هالشي مخلي طفل كلش ودي و محبوب و يعبر بطريقه الطف

 من عدنا بعد

 

 " الحضن " الشعور الجسدي الوحيد اللي يلمس الروح 

هالموضوع تزيد اهميته ويا الاطفال لان الطفل يحتاج اهتمام عاطفي  كبير خصوصا بعمر " السنتين " اذا الطفل تعامل بقسوه بهالمرحله 

وما حصل على اهتمام كافي راح يخلي يصير طفل متجنب 

هالطفل من يكبر يصير بارد عاطفيا وبعيد بالعلاقات

 العاطفية وعادة يجنب الروابط الحقيقة وحتى لو شاف نفسه 

بعلاقة او متجه تجاه علاقة حيلكي طريقة حتى يبتعد ويفصل نفسه

 (لان تعود من هو طفل أن التعبير عن المشاعر هو شي مو صحيح )

" مُلامسه ألقلوب بالكَلماتْ أللطيفه أكثَر ألمَشاعِر خْلوداً في ألحياه  "

بالنهايه ، اتمنالكم حياه صحيه ، ايجابيه و مليانه حب ويا اشخاص

روحهم حلوه تشبهكم 

كُل الحُب 💕